विश्वनाथ उपाध्यायको शोकमा आज सम्पूर्ण न्यायालय बन्द

१९ माघ, काठमाडौं । पूर्व प्रधानन्ययाधीश विश्वनाथ उपाध्यायको शोक आज सम्पूर्ण न्यायलयहरु बन्द हुने भएका छन् ।

सर्वोच्च अदालतले आज नेपालभरका सबै अदालत, विशेष अदालत र न्यायाधीकरणमा बिदा दिने निर्णय गरेको हो । विक्रम संबत २०४८ देखि २०५२ सम्म प्रधान न्यायाधीश रहेका उपाध्यायले त्यसअघि सर्वोच्च अदालतका न्यायाधीश, नेपाल कानुन सुधार आयोगका अध्यक्ष, नेपाल अधिराज्यको संविधान २०४७ को मस्यौदा गर्न गठित संविधान सुझाव आयोगको अध्यक्षलगायतका निकायमा रहेर उल्लेख्य भूमिका निर्वाह गरेका थिए ।
परिवारका सदस्यहरुसँग गफगाफ गर्ने क्रममा अचानक ढलेका उपाध्ययको मस्तिष्कमा रगत जमेको थियो । मस्तिष्कमा जमेको रगत निकाल्न शल्यक्रिया गरेपछि सिकिस्त बिरामी परेका उनको उपचारका क्रममा बाँसबारीस्थित न्यूरो अस्पतालमा निधन भएको थियो ।